昂貴是這刻

 -------- 陀飛輪

湊仔的打扮

太太太太耐無寫blog啦！有很多很多想法、感受、經歷想記低，但未有時間慢慢組織。寫住篇無無謂謂的分享先。

有仔女之後，打扮便不能隨心所慾了。尤其需要外出哺乳的時候，更加要考慮周詳。

前面有鈕扣「開胸」的衣服最適合（拉鏈也可，但怕會刮到BB的臉），哺乳的時候只需解開幾顆鈕扣便可以了，否則要掀起整件上衣，露出腰和肚，又冷又不雅。找不到育嬰房時，蓋一塊哺乳巾，就隨時隨地可以餵到BB。

政府鼓勵母乳餵哺，甚至禁止半歲以下的嬰兒奶粉賣廣告、送試用裝……但作為一個人奶媽，我覺得問題根本不是出在奶粉商。香港的社會環境和公共設施實在太不breast feeding friendly啦。我們常常想不到假期可以帶BB到哪裏玩，來來去去都是一些大型商場，育嬰室又常常要排隊使用，每次上街也十分緊張。去些戶外的地方吸吸新鮮空氣，但又怕沒有地方哺乳。雖然我有哺乳巾，但很多人仍未接受婦女在公共地方哺乳。在外哺乳的時候，雖然遮住晒咩都睇唔到，但仍有很多人會對我投以奇怪的目光，或盯著我望，或顯得尷尷尬尬的，搞到我都尷尷尬尬。據我所知，台灣地鐵站的地圖，有些胸圍的標誌（嗯……我覺得這個標誌雖然很搶眼，但實在不美觀，這真是一個品味的問題）顯示附近可以餵哺母乳的地方。其實不用大興土木，萬馬千軍，大灑金錢發展這個那個，我覺得我們這個地方就是需要一些關懷、一些細心。

政府亦應向商業機構宣傳，為哺乳的婦女提供方便。例如：lunch time闢一間房供pump奶，令我們不用每天為找個地方棲身pump奶而煩惱；延長餵哺母乳的婦女的產假^^或准許晚一點上班，這樣我們便不用天未光就起床餵奶、pump奶……

可能有些人會覺得生仔大晒咩！？餵奶大晒咩！？唉～作為一位哺乳的在職母親，真是每天都在挑戰體力和耐力的極限，就像跑馬拉松一樣，但這個馬拉松不是四個鐘內完成，而是半年、一年，甚至兩年，七天廿四小時，沒有一天休息，生理或心理稍有點不健康，也很容易放棄，所以就畀我地大晒一次啦！其實，人奶BB有較多抗體，少點病痛，耗用醫療資源少Ｄ；人奶媽媽不用經常請假照顧病了的BB，可以正常上班，促進經濟發展；餵人奶修身快Ｄ，少了產後走樣的媽咪……整個社會咪和諧Ｄ、靚Ｄ囉！

我應該去信衞生署或CY，而不是在這裡依依哦哦，哈哈，其實我原本只是想講我為此買了很多衫，並post一下新衫相^^

細B 34 weeks, B坤19 months

真係好偏心，陀細Ｂ無咩影過相，趁老公帶了B坤去playgroup，做點家務，便趕快拍了段胎動的短片。拍不到十分鐘，門鐘便響了，佢兩父子回來，我又周身唔得閒，幸好細B好合作，一take OK，仲表現得好活躍，乖女呀！

B坤已經19個月大啦！18個月時返健康院檢查，佢已經增長到90%的生長線，由出生時的中碼BB，到飲人奶的中大碼BB，到而家成為一名大碼Ｂ啦！所有發展都正常，姑娘還稱讚他說話能力很好，因為同年齡的BB，應該識講簡單的詞語，例如鞋鞋、車車等，但B坤已經能講「著鞋」和「坐車」，係簡單的句子組合啦！我還發現佢今個月開始，可以講完整的句子：「BB開門。」「爸爸執波。」「爸爸夾魚魚。」「媽媽git爸爸。」叻仔呀！^^

為母則強

這是我收到的第一份母親節禮物呢，很喜歡啊！

真係好耐無黎, 呢度都變得有D陌生勒。

實在太多太多野想寫、未寫……都唔知點開始添……等我快速update一下:
1. 我就快多個女啦, 預產期係九月尾。希望阿女唔好怪我偏心啦, 無陀B坤果時成日update個過程。

2. B坤十六個月啦, 已經識行識走,識講好多野：媽媽、爸爸、嫲嫲、婆婆、姐姐……車車、魚魚、Arf Arf（狗）、阿貓、筆筆、阿畢（bus）、apple、star、eye、arm……除左N、P、Q、U、V、W和Y之外，已經識讀晒所有大楷英文字母，還會數one to ten，我都十分佩服佢。

做左阿媽之後，好似無論身理和心理都「強大」了，無論幾唔夠訓，都一定暗左個仔訓自己先訓得安樂；無論幾攰，都擠得出力氣陪個仔玩、幫佢沖涼、換片、煮飯畀佢食……真係唔係講笑，好似連病痛都少左，而且無論情緒是高是低，對住個仔都永遠笑得出。

除了不再弱質，心中也有更多夢想，我要讓我的兒女看到這個世界有很多可能性，只要有勇氣、有想像力、肯努力，一定可以活得精彩的。曾看過一句說話：「媽媽不快樂，沒有人會快樂……媽媽改變了，世界便會改變。」我相信是真的。

奶媽最痛IV

時光飛逝，B坤已經八個半月大啦！而且已經叫過「媽媽」啦!!
真係開心死我，仲搞到我眼濕濕添，另文再寫啦！
前一排實在太忙，完全無時間寫Blog，我要快手追反ｄ日誌，否則怕會唔記得呢段咁特別的時光呀。

快速Play back，上次講到我被B坤咬損又好番，以為最辛苦的日子都捱過去了。有一天，已經忘了因為何事（真係要快ｄ記低啦，已經有好多事忘了），陪月放假，老公要返工，我和B坤單打獨鬥一天。當時B坤約三星期大，由早上十一時開始，他便不停地吃！我發現佢食左成個鐘，個嘴都仲係不停咁啜啜啜，我一甩開佢，佢就狂喊，一定要繼續食。

我不知如何是好，唔餵就狂喊，餵又驚佢食滯，咁細個肚仔會頂唔住。於是我打去健康院的母乳熱線求助。呢條熱線都真係打救過我好幾次，而且ｄ姑娘又好鬼好傾。姑娘話B坤可能到了「快速生長期」或稱「猛長期」，呢個時期的BB是會食唔停的，這樣一來是為了應付他成長的需要，二來亦為了刺激我有多些母乳，所以只要BB想食，我就應該繼續餵，她說：「人奶是絕對唔會食滯人的！」

好，有佢呢句說話保證就得勒！我決定捨命陪君子，佢想食幾多食幾耐，我奉陪到底！結果那天，我由早上十一時餵到下午四時！搭長途機都仲有得周身郁，得閒伸展一下，餵奶就唔同，除了去廁所、扒兩啖飯和幫B坤換片之外，就只可以坐定定，仲要畀成十磅野責住，餵完真係成個散晒，得返半條人命。

已忘了B坤的「快速生長期」維持了多久，只記怒食奶的情況，慢慢由早轉到晚，好多個晚上，我由「東張西望」開始餵，一路餵一路看電視上下網（無錯，我一隻手托住阿仔，仲有一隻手可以上網，但在facebook就只能click like，好少單手留言勒～），餵到睇完「女拳」都仲餵緊。晚飯也由飯枱移師到我的餵奶寶座，有時我單手夾餸食，有時就由老公餵我幾啖飯菜。

B坤總共做了五個半月全人奶BB，由五個半月開始才逐漸加入糊仔、粥仔等副食品。現在的B坤已經不會馬拉松啜奶，一般食廿分鐘至半個鐘，最耐也不會超過四十五分鐘。餵奶餵到呢個階段，真係「舒服」晒啦！

奶媽最痛III

呢個就係我的餵奶寶座，由於一坐低餵奶，可能就坐粒幾兩粒鐘，所以必需品一定要隨手可得。左手面有電視遙控和紙巾，右手面有laptop加湯水。

未生之前做資料搜集，都知道餵人奶好難成功，十分辛苦，所以當初都無諗過可以全人奶，而且維持到咁耐。生仔之後，遇到的問題日日新鮮，只想著應付當下的問題，餵好呢餐奶，其他事情都無暇多想了，點知就這樣餵下一餐，餵下一餐，就過左三個月！有時望住阿仔，見佢精精靈靈，肉騰騰，我都幾難相信佢只係食我的奶長成這樣的，大自然真係奇妙！

B坤出世頭一個星期，我完全不知所措，每次餵奶都搞成粒鐘，好似打仗咁，和他搏鬥一輪，才找到一個他啜得舒服而我又唔痛的姿勢。因為人奶易消化，BB每隔兩個鐘就要食奶，咁我餵完成粒鐘奶，掃完風，換下片，便又夠鐘再黎過，每日就係不斷咁重複以上的步驟。向健康院姑娘哭訴，姑娘話頭兩星期係辛苦ｄ，遲ｄ佢就會食得疏ｄ架啦，我懷著「會過去的……」的希望捱下去。

第二個星期，返健康院檢查，BB已經重得好好，醫生話可以餵疏ｄ啦！日頭三個鐘餵一次，夜晚仲可以四個鐘餵一次添！但就係呢個時候，我兩邊都畀B坤啜損左！之前睇資料，我已經知道餵奶姿勢一定要好正確，否則畀BB啜損左就好慘架啦。我一直都好小心，一有少少痛都會拉返BB出黎，make sure BB嘴形和姿勢都正確先會繼續餵，但結果都係損左。我諗係我每次畀BB啜得太耐啦，皮都被磨薄左。

一損左就慘勒，每次餵奶，阿仔一啜埋去我都痛到忍唔住大嗌一聲，痛到腰都伸唔直，等阿仔啜十零下之後，痛到麻木晒就唔再痛了，可以如常餵落去。我覺得衰就衰在呢度，如果餵全程都痛，我可能已經放棄了，但就係每次都只係忍受開頭果十零廿秒，所以我又忍埋佢，繼續餵落去。最怕就係B坤食食下「甩嘴」，因為又要再黎過再痛過，真係超級沮喪。

無助的我，上網search資料，又畀我睇到呢個Blog，呢位媽媽泵奶泵出啡奶，因為畀仔啜損左，泵奶時扯開左傷口搞到噴血！！我從未覺得過自己的母愛有幾偉大，亦絕對唔覺得要受苦受難先體現到母愛，但睇到呢篇文，我真係覺得勁！我的小小損傷只係好小好小好小兒科。

於是我又繼續落去，過多一星期，損傷自己好返勒。到左而家，無論B坤咩嘴形咩姿勢啜埋黎，我都唔覺得痛lu，每次都可以一步到位（哈哈，老細金句），一啜搞掂，因為ｄ皮已經啜到厚晒，無咁易損luL。

奶媽最痛II

三個月啦！B坤已經做左三個月全人奶B勒！兩個月時去健康院磅重，已經有6.09KG，作為人奶B，實在重得非常好，超級supportive的健康院姑娘當然次次都讚到我上天啦！我真係好喜歡健康院的姑娘和醫生，不論對媽媽或BB，她們全都表現得好有愛心和耐性，態度輕鬆、親切，講解又清晰和專業，每次去健康院，我都得到好大的鼓勵，唔係講小，佢地係我捱得到而家的原因之一。

餵人奶辛苦，我有想過放棄嗎？有！天天都有！每次餵到好辛苦好辛苦時，都會同自己講：「算啦，唔好畀咁大壓力自己，下次一於餵奶粉啦～」但辛苦過後，到下餐食奶時間，又會收拾好心情再黎過。

我覺得餵人奶最難受的，不是肉體上的疲累和痛苦，而是心理上的不安定和徬徨。埋身餵人奶，根本不知道BB食左幾多，要知道他食得夠唔夠，就要睇之後片片的數量，但片片反映的只是歷史，你知道他昨晚或今朝食夠了，但上一餐呢？當BB食完奶仍哭鬧不止，或不夠半個鐘又再扭食時，你就會懷疑自己是否唔夠奶，或奶的質量不好，唔夠後奶。

我都係做左阿媽先知，人奶有分前奶和後奶。前奶就是BB開頭吸食的母乳，後奶就是食到最後的母乳。前奶含有豐富的營養，顏色較淺，像薏米水，由於水分較多，不太飽肚；後奶則有豐富的蛋白質和脂肪，BB夠唔夠飽，長得肥唔肥壯，就睇佢食得多唔多後奶勒。通常頭五至十五分鐘，BB食的都是前奶，十五至三十分鐘後的才是後奶。所以餵人奶快極有限，起碼要餵廿分鐘至四十分鐘才穩陣，如果BB食唔夠後奶，好快就喊餓，咁你就要再餵過，搵自己笨。

餵人奶，媽媽的壓力很大。BB哭鬧有很多原因，可能因為肚餓，可能因為要換片，可能扭眼訓……但人奶B一哭鬧不止，大家都不會想其他，第一時間就係望向佢阿媽我：佢係咪肚餓？佢頭先係咪食得唔好？你係咪唔夠後奶？……令我更加懷疑自己，mothers’ guilt更加嚴重（講少少題外話，Mothers’ guilt同產後抑鬱一樣可怕，有個電視節目，講一個母親，她的女兒廿多歲便自殺身亡了，這位母親十年來不停回想自己照顧女兒時有甚麼地方做錯了，結果，她不斷怪責自己，在女兒兩個月大的時候，任由她哭了廿分鐘……）

講到呢度，我呢個衰新抱真係忍唔住要講下奶奶壞話，希望佢無機會睇到。每次奶奶抱孫，BB一喊，佢就諗都唔諗，即刻隊畀我：「佢肚餓呀！」無論我點講：「唔係喎，我岩岩先餵完佢，佢食左成粒鐘啦！」「唔係哩，抱極都喊，佢係肚餓呀，你試下畀佢啜，睇佢食唔食。」最衰的就係，我個仔無論咩時候，肚唔肚餓，畀佢啜佢都實啜的，所以我根本無得拗，如果唔畀佢食，奶奶又會覺得我虐待佢個孫咁，所以無論我當時有幾累都要照餵多次。

有時，我都覺得幾委屈，奶奶成日同人講話個孫易湊，梗係啦，佢根本無試佢在個孫扭計時氹佢，一喊就隊畀我。所以呢，我都幾抗拒佢來「幫手」的，佢係度，我仲辛苦左～

唔好意思，今日怨氣大左少少，係咁架啦，成日唔夠訓～ 死啦，我有些daughter-in-law's guilt添，講返奶奶的好說話先，佢而家好好架，每朝要五點起身，飲完茶來幫我地睇BB，其實我都好感激佢的^-^

奶媽最痛

唔經唔覺B坤都兩個幾月大勒，除了出院那天，我們怕佢突然轉晒食人奶會唔夠飽，補左一次奶粉之外，B坤都是食全人奶的。

呢兩個幾月來，我以為已經咩咸苦都經歷過啦，點知原來係未完的！

四月開始返工，返工前一星期我就開始在繁忙的湊仔餵奶生活中，再擠壓時間出來泵奶作儲備。由於阿仔食得密，餵完佢再泵已經所餘無幾，每日大概只能泵多一餐的儲備，真係滴滴皆辛苦。

上星期放完產假返工，開始返公司泵奶的生涯。每朝六點半起身梳洗，七點埋身餵奶，八點泵奶，八點九洗泵奶器具再steam一次，換衫，執齊泵奶器具，九點三出門口返工。下午用廿分鐘食飯，然後拿拿聲走上廿樓會議室，封窗，set好架生，洗手，再泵半個鐘。

講咁多，唔係因為想嗌辛苦，而係想帶出以下的事件對我有幾大打擊。辛苦係梗架啦，我預左，只係估唔到有ｄ無預過的意外啫！

話說果日，我如常帶著在公司泵出來的奶返家，然後就飛身埋身餵仔，叫老公將泵奶放進冰箱。到了半夜一點，我暗左阿仔訓教，醒起未在奶袋寫返日期（做左阿媽，無論幾眼訓，都仲會記起阿仔ｄ野），點知入到廚房，就發現冰櫃門無閂好！！！！果下，我真係眼前一黑，晴天霹靂！

我立即檢查儲備，已經有大半融左啦！！！！！我ｄ眼淚真係即刻標出黎，完全崩潰！幸好Lak當時訓左，否則以我當時的狀態，一定會訴諸暴力，就算唔釀成倫常慘劇，都一定會家變。

Lak仔佢好彩，訓得早，我未至於殘暴到打醒佢來鬧。我自己在廚房發癲，又唔敢大嗌嘈醒個仔，結果我好淒涼咁抽泣住咁刷牙洗臉訓教，因為再唔訓，阿仔醒左又無得訓……

Surviving Motherhood

之前提過出院之後的兩個星期，差不多天天都哭。

第一次是因為谷奶，痛到喊。

第二次是出院當天，陪月，奶奶、叔仔也來幫忙。大家都很好，我一餵完奶，便接手照顧BB，要我去睡，不讓我掂水、不讓我蹲下來，不讓我拿重的東西，不讓我走來走去……對於向來不喜歡生活被干涉的我，他們的「協助」，實在很難頂！雖然很累，但我不想去睡，我想洗澡，我想收拾出院後的物品，我想抱BB，我想看看書上上網……我覺得這樣才是休息啊。

好不容易，等到大家都走了，我就哭著對Lak說：「我要沖涼啊！我要洗頭啊！否則我會產後抑鬱。」嚇得佢～

第三次，是出院第二天，我們去母嬰健康院，姑娘問了我和Lak很多問題：BB出世的重量、一日食幾多餐、換幾多次片，每條片有幾重、便便是甚麼顏色、便便有冇粒粒……丈夫有沒有給我支援，嘩！問到呢條就死勒，我即時諗起，這幾天，Lak與我並肩作戰，通宵餵奶換片，還要被幾個女人（奶奶、媽媽、陪月）點來點去，買這買那，頻頻撲撲，其實他也並不比我舒服，「他十分支持我啊！」我說，鼻子一酸，眼眶就充滿淚水了。我當時是背著Lak坐的，他看不到我想哭，但姑娘卻全看在眼裡，她不動聲色咁問多一兩條問題，然後就使走Lak：「我還有些問題要單獨問問媽媽，爸爸先出去吧！」

Lak一走，姑娘就立即慰問我：「丈夫真的有支持你嗎？他對你好嗎？」噢！！！她以為Lak虐待我！我立即澄清：「有有有，他真的很好，我諗，我只是太辛苦了。」一講到這裡，我又忍唔住喊起上來，實在太太太太太失禮了。姑娘再溫柔地詢問：「是因為餵人奶嗎？餵人奶是很辛苦的，你是自願選擇餵人奶的嗎？記住呀，你可以選擇架，如果太辛苦，你可以餵奶粉。」噢！！！她以為Lak逼我餵人奶。

我冷靜下來，再好好解釋我覺得辛苦的地方，姑娘終於安心了，十分親切地安慰我：「傻妹，係咁架啦，你岩岩生完，受荷爾蒙影響，係容易喊ｄ的。我生果時都唔知喊左幾多次啦～頭幾個月係辛苦ｄ，到佢大ｄ，好湊ｄ，同你培養出感情，樂趣就會黎架啦～你睇下，BB重得咁好，你又唔使補奶粉，已經係好叻好叻架啦！」聽姑娘咁講，我諗諗下，又真係覺得自己都幾叻喎，之前掛住忙，都唔記得讚自己添。

自從知道自己易喊是受荷爾蒙影響，我就豁出去了，有少少唔順意就喊，無得訓喊，有得訓又訓住喊（因為訓左就無時間做其他野），奶奶關心我又喊（當然是背住佢喊啦，咪嚇死佢咩），媽媽嘮叨我又喊，覺得老公好好又喊，覺得老公好衰又喊……所以就攪到頭兩個星期差不多日日都喊過咁滯，有時仲攪到兩公婆一齊攬住喊……又係而家諗返就覺得好低能，但當時真係覺得好慘架。

冧晒啦

原本想呻埋湊仔有幾辛苦，但今朝畀阿仔氹返，冧晒啦～

今朝阿仔六點幾就開始嗌，Lak起身查探，見佢唔係扭食，就叫我繼續訓，佢去暗阿仔訓返。

暗左半個鐘，阿仔仍然依依呀呀，用他的BB話嗌下叫下又停下。我心諗，個仔一定係扭食啦，呢樣係唯一爸爸畀唔到佢的野。點知我行埋佢床邊，一摸佢塊面珠仔，佢就望實我笑啦，完全唔係喊食！佢個樣好似想講：終於見到你啦，我叫左咁耐就係叫你咋！

真係好sweet架佢個樣，Lak就只有在旁羡慕啦～

之前都唔覺同BB有甚麼特別的Bonding。初初由醫院回家，BB對我和新環境仍然非常迷惘和陌生，佢根本唔知我係佢阿媽，對佢黎講，我只係一個粮倉。食完奶，利用完我，就呼呼大睡。有時佢喊，Lak或陪月抱佢，都可以安撫到，但我一抱佢，佢就喊得仲大聲，因為佢聞到我陣奶味，又發癲要喊食。

經過七八個星期日餵夜餵，佢終於識得望住我笑，仲會用BB話同我傾偈，真係守得雲開囉～

石頭胸

生仔後確實有點產後抑鬱，而主因是餵人奶。

我可以說餵人奶比陀仔和生仔辛苦十倍。我覺得陀仔一點也不辛苦，而且我是開刀生仔的，傷口真的不太痛。

生仔之後的頭兩個星期，差不多天天都哭。

開刀後第一天，我便下床去餵奶了。第一次並不成功，阿仔掛住訓，我又不知從何入手，St Paul的姑娘也沒有甚麼有用的指導（我覺得St Paul麻麻地）。這次之後已有點沮喪，但仍叫自己不要放棄，大家都說餵人奶並不是輕易的事。

第二日我努力嘗試，卒之阿仔肯啜了，我的奶媽生涯正式開始。

那天晚上，維記和Karen來探我，送走她們之後，我去參加出院前的講座，漸漸覺得個胸越來越硬，越來越痛，開始上奶了。

講座完畢後，我問姑娘借奶泵，但姑娘叫我唔好泵，因為越刺激佢地就越痛，叫我忍一晚，第二天阿仔出院後，我正式餵奶就無事了，並叫我用熱毛巾敷。於是那天晚上，我便走來走去，到洗手間用熱水敷胸，不過，這個方法是不行的，我的胸越來越硬，越來越痛，大左兩倍，變左石頭胸。

這是生仔後第一次喊，痛到喊。我忍無可忍，打電話畀餵緊人奶的Natalie和陪月，她們都叫我一定要泵出來，否則乳腺塞左發炎仲麻煩。晚上十點幾，我再到哺乳房找姑娘，今次個姑娘話抱阿仔出來畀我餵，但阿仔未係好會食人奶，我出奶也未係好流暢，結果餵左好耐，都只係舒緩左少少。

回房後，上床典來典去，越來越痛，又谷過。於是零晨兩點幾，我又騰去哺乳房，今次另一位姑娘又畀我泵奶了。入到去，見到另一位媽媽泵緊奶，我們立刻有同病相憐的感覺，雖然又累又痛，但一邊泵，一邊有人傾下講下，都無咁慘。

做左阿媽啦！

剛剛餵完奶，趁阿仔訓左，寫寫最後一篇Belly journal先。
呢兩張相是38週，生仔前一日拍的，個肚有41寸。


一月十五日，早上九點，出發到聖保祿醫院。
由於血小板不足，我要全身麻醉剖腹產子。手術前六個小時不可以飲食，所以我和Lak一早便出發，到Deli france吃了個豐富的早餐。可能有Lak陪伴著，一路說說笑笑，手術前也不太緊張，到醫院登記、檢查後，我休息了一會，洗了澡，便可以進手術室了，一切也算順利。


手術後，我像睡了一覺，醫生把我叫醒，第一句跟我說的話就是「你做左媽媽啦！」
我接著問醫生BB健康嗎？醫生說BB很好，重3.3kg。
聽到這裡，真的有說不出的舒暢，鬆一口氣了。


回到病房，姑娘便把阿仔帶到我身邊，讓我抱抱他。我沒有很激動，也沒有流淚，但看著他小小的臉龐，撫摸著他軟軟的皮膚，真的有說不出的滿足，那一刻，我覺得他是世界上最美麗的東西。

明天出發去生仔啦！

快速報告下先。
一星期的產前假期，眨下眼就過左，明天一早就出發去生仔啦！
現在的心情，有點似考試前席，十分緊張忐忑，驚有野未準備好多過開刀。
好，講住咁多先，生完再慢慢update!See U!

Nesting instinct

就生勒，我的nesting instinct開始強烈勒，每個週末就是忙於幫阿仔洗衫仔、洗被仔、洗玩具……總之佢有機會接觸到東西都要洗洗洗洗洗……行來行去執下呢樣，抹下果樣，好似好忙碌咁。

幫阿仔間房換了遮光較好的窗簾。已經沒有時間和精力周圍去揀勒，就在附近的街市搞掂，但遮光布的選擇很少，花紋不是太宮庭太華麗，就是太花太俗，很難得才找到這塊清清地的藍天白雲（真係在布堆底找到的～），但結果……
大家有何發現？
哈哈哈哈……就係裝好的窗簾有一邊的白雲全是倒轉的！這就是倒轉了的一邊。
由於裝窗簾的師傅話要鑽洞，所以我這個大肚婆就被趕至會所，直至佢地搞掂晒才能回家，結果老公和阿師傅都唔覺有任何問題囉，直至我回家，望下望下硬係覺得有ｄ唔妥才發現。
本來我倆怕麻煩的夫婦都諗住由得佢：「有一邊反轉左都幾得意丫，第時可以叫阿仔找錯處。」但越諗越不忍心佢一出世就成日要望住ｄ怪怪地、錯錯地的野，所以都係叫窗簾鋪改返。

最後，送上平安夜，35週的肚，新年快樂啦！

胎動

無錯，下面的大攤肉就係我個肚腩啦！希望不會令大家情緒不安:D

經過幾次我一開機阿仔就唔郁，一關機佢就勁踢的玩野試驗之後，

終於畀我拍到佢郁郁下勒，雖然今次唔算郁得好勁，但都幾清楚架啦，將來可以畀佢睇返呀。

聖誕快樂

最後一個二人世界聖誕節啦！

34週，個肚有39寸啦！
呢兩個週末，都在洗BB衫。原來洗BB衫都要用幾多時間，洗之前又要先洗下個洗衣機，又要分顏色質料，分好多機洗，不過見到一件件洗乾淨的、又軟滑又可愛又清香的BB衫仔、被仔、蚊帳仔，又令我感覺好溫馨。

38寸

好耐無update我的大肚腩日誌啦，快快手寫兩句先。

32週的佢已經……38寸啦！！

1st Anniversary

結婚一週年啦！我地去返擺酒間酒店吃飯。
這間餐廳叫Mistral，就在我們婚宴場地的下一層。

食物味道都不錯，氣氛很好。

這一年最大的改變，當然是有左阿仔啦！
當我還在適應做別人的老婆，還未理清有甚麼不習慣的時候，眨下眼，還有兩個多月，我就要當別人的母親了。

我們這一年都相處得不錯吧，我們會互相愛護，還會互相照顧。

可能有太多新事物要學習了，又有很多計劃和目標要進行，生活總是忙碌和充實的，根本沒有時間去挑剔、執著和計較。勤快的時候，家務都是爭著做的，誰有空就誰做，有時慢了一步，他就把碗洗了，那我就去晾衣服，也根本不用分工。想慵懶一點的時候，就一起慵懶著，由得地方亂七八糟，他不會向我抱怨，我也不會有難看的面色給他看。

不知道將來會不會有一天，對方做甚麼，我們都看不順眼，變成一對吵吵鬧鬧的怨偶，可能到時又會有另一種趣味和體會。我知道的是，直到今天，相處了一年，看到他，我還是想抱抱他，還會想拉他的手一下……他仍然是很順眼的呢！

一年

上年的今天，有腰的我。 今年，有肚的我。

已經28週啦！

肥肥肥

24週，肥左十四磅，上個月最犀利，肥左六磅，醫生話：一個月最多肥四磅好啦～
上個月，Lak生日完又到我生日，跟住又中秋，真係食大左呀～
好，又show下巨肚先。
我仲有繼續游水架，Touchwood，暫時未有妊娠紋，肚臍平左頂啦，應該不日就會凸出來:P