由於血小板不足，我要全身麻醉剖腹產子。手術前六個小時不可以飲食，所以我和Lak一早便出發，到Deli france吃了個豐富的早餐。可能有Lak陪伴著，一路說說笑笑，手術前也不太緊張，到醫院登記、檢查後，我休息了一會，洗了澡，便可以進手術室了，一切也算順利。
就生勒，我的nesting instinct開始強烈勒，每個週末就是忙於幫阿仔洗衫仔、洗被仔、洗玩具……總之佢有機會接觸到東西都要洗洗洗洗洗……行來行去執下呢樣，抹下果樣，好似好忙碌咁。
哈哈哈哈……就係裝好的窗簾有一邊的白雲全是倒轉的！這就是倒轉了的一邊。
24週，肥左十四磅，上個月最犀利，肥左六磅，醫生話：一個月最多肥四磅好啦～
我仲有繼續游水架，Touchwood，暫時未有妊娠紋，肚臍平左頂啦，應該不日就會凸出來:P
大肚婆不宜，但我有食呀，點忍喎～
看到我的巨肚嗎？不是有心blur左張相的，只是由冷氣地方走到室外，相機佈滿水氣，加上外面下著大雨，濕氣極重。
十八週，我已經肥左八磅啦！
十五週，可以游返水和做瑜伽啦～孕婦要在十二至十四週，做一個名為Oscar的檢查，看看BB患唐氏綜合症的機會。我在十三週去做這個檢查。未去之前，我只知道要量度BB「頸皮」和抽血，至於點量法，我就唔清楚勒，所以老公問使唔使陪我去時，我也一口拒絕：「睇下條頸皮咋喎，應該無咩好睇，唔使啦～」
去到中環的診所，又係有成村人等緊，以為有排等，點知又好快叫我入房囉喎。這間診所比我平時做產檢的診所大很多，設備也先進很多。姑娘安排我躺在椅上，幫我蓋了薄毛巾，調暗了燈光便離開了。以為醫生轉眼便到，點知這一躺，便是半個鐘！由於環境太舒服了，所以我也睡著了。醫生來到，我才如夢初醒。
原來度「頸皮」和平時產檢一樣，都是照超聲波，但這裡的儀器較厲害，所以看得更清楚仔細。醫生用超聲波的棒棒在我肚皮上掃了幾下，冷不防，他就對我說：「係仔喎～」
我一直都有想像，自己會在甚麼情況下知道BB的性別。我想，應該要和老公一起的，然後兩人好緊張咁問醫生：「係仔定女呀？」醫生會故作神祕：「你估下啦……」／「睇唔到喎，佢夾住左隻腳喎，咪住！睇到勒，係……」／「你想知咩，我唔話你知住……」等等等等，這些都是我睇戲、睇blog和聽別人的經驗分享而估計的情況。點知，這樣不費吹灰之力，我就知道BB係仔啦！
當時心裡也有少少埋怨醫生，怎麼都唔問人一句：「你想唔想知係仔定女？」你唔畀我唔想知架，我老公又唔係度，無得一齊心急如焚，心如鹿撞，又一ｄ都唔dramatic……
其實，我仔女都喜歡，Lak就喜歡仔，可以和他踢波。知道係仔之後，開始幻想到一個男BB的樣子，感覺實在多了，也可以開始買些BB衫仔，hehehe……
接着，醫生幫我照了BB身體不同部位：
「呢隻係手，有五隻手指。」
「腳仔，有五隻腳指。」
「心臟，聽下心跳……正常。」
「頭圍，OK」
「呢個係胃……手臂……脊骨……」
「呢個鼻樑，好好丫。」
「睇到個嘴唇喎，張開口添，照睇應該無兔唇，good～」
噢……原來有咁多野睇，Lak一定好後悔無跟埋黎啦！
量度BB頸皮，原來係量度BB頸皮後液體佔的厚度，結果亦正常。
最後，醫生再check多次，BB的性別係仔，並在螢幕上打了BUY，無錯，醫生打錯字，不過他在我未笑和未出聲之前，已經改返BOY勒。
檢查完畢，醫生給我一疊BB的相和DVD。回家後看DVD，原來是檢查時，我在螢幕見到的整個過程，而且錄埋音！！Oh，shit， 早知我就講多ｄ野，同埋講ｄ有意義ｄ的野啦！！
整個過程，我只係講過四句說話：
醫生：「係仔喎～」
我：「哦！？係仔？」
醫生：「聽唔聽到心跳呀？」
我：「聽到。」
醫生：「呢對應該係佢對眼勒。」
我：「hehe….」（都唔知我做乜～～）
醫生：「睇多次性別，見唔見到兩隻腳中間？」
我：「哦！呢個就係……」
醫生：「係！」
十二週的肚，已經唔係一般的飯後肚腩，應該係BB勒。陀B第六週開始頭暈暈，那種暈像是一天廿四小時，除了睡着，都在坐船一樣，浮浮下。孕婦的血壓本來就低，遇上我這個低壓人，頭暈實在無走雞。
到第十一週，有一晚起身上廁所（懷孕頭三個月每晚都要起身兩次上廁所），發現去唔到！我都知賴野啦，之前在《What to expect when you are expecting》（這本書很值得推介啊！）上睇過，有五分一孕婦，膀胱會被增大的子宮壓著，去不到小便。我立即摷書看，並繼續嘗試小便，但就是不能！！書上建議，我這種情況應該去求醫的，醫生有簡單的方法，可以幫我移返好個位。
不知是因為廁所有點焗，還是我睡得不好，還是我有點panic，總之我又暈了。
這次，和中七那次一樣，是突然失去知覺的，醒後發覺自己伏在洗衣籃上。我檢查過自己沒有任何損傷，手腳肚頭也沒有痛後，便立即叫醒Lak去急症室。
到了急症室，原本以為等好耐，因為我那時又沒有暈了，只是有點尿急。但可能因為大肚大晒，急症室有成村人等緊，有些還奄奄一息似的，但我還是第一個被叫進診症室。
醫生幫我check過身體沒因暈低而受傷，BB也好像沒有問題，接著便是小便的問題了。我以為他如書上說的，很容易便可以幫我fix the problem。但他只是畀左個樽叫我留小便。下，如果我留到小便，就唔使黎啦！不過，最後醫生也只叫我再試試。
結果我試了半小時仍然去不到，我和Lak只好坐在候診室，一邊喝水（希望急ｄ可以去到）一邊看世界杯，那是德國對西班牙，想不到會在急症室看。過了一會兒，醫生見我仍然去唔到，一副無能為力的表情。那時我真的急了，心又急，身又急。我問：「咁現在有咩辦法可以幫到我？我好辛苦啊！」（其實我有小小誇張的，但見他無乜表示，我惟有加多幾錢肉緊做個辛苦樣。）
結果，醫生是沒有「簡單」的方法幫我的，我想過會不會是外國的醫生有方法，香港的醫生不知道呢，很有衝動畀本書佢睇下。最後，我逃不過插尿喉的命運。
幸好，插尿喉沒有想像中痛苦，是有點不舒服，但也是插喉那幾秒的事，很快便沒感覺了。
我在醫院裡睡了兩晚，可能因為疲倦，也可能因為插了尿喉，不用上廁所，所以反而睡得非常舒服安穩。
第二天，我仍然插著尿喉，等待醫生檢查。我留醫的是外科病房，不是婦產科（我也不明為甚麼是外科啊～），醫生們很年輕，好像有點不知怎樣處理我和肚裏的BB。他們也好像不會看病歷似的，每次有新醫生來，我都要再三提醒：我有BB（即：不要亂開藥啊！）
有一次，兩個年輕的醫生來看症，他們揭了一輪我的病歷，
我：「我有十一週BB。」
醫生A：「啊～你有BB。」（好似岩岩知～）
我：「我去不到小便，和BB有關嗎？」
醫生A：「十一週BB有幾大？」
醫生B：「我都唔知，呵呵呵……」！！！？？？
最後他們只是安排了姑娘幫我check BB心跳：
早上，姑娘A check到心跳，叫我不用擔心。
中午，姑娘B check到心跳，但對另一姑娘說（無錯，不是對我說的，但我躺在旁邊）：「BB心跳慢ｄ囉。」我問：「下，慢左？咁係咪正常，有冇事架？」姑娘B又話：「可能BB仲細啦，你等醫生來檢查啦！」
晏少少，姑娘C來check心跳，但check唔到，佢話我之前聽到果ｄ心跳聲，其實都只是我自己的脈搏！！下，點解個個姑娘check都唔同架！？
到醫生A來了：「BB太細啦，可能未check到心跳架。」
我做個懷疑的表情，睥住佢「……」
醫生A自己都無乜信心，但將責任交返畀我：「咁……你係咪好擔心丫？」
我：「我係十分非常擔心喎！！」
醫生A：「咁……咁咁，我試下安排你過婦產科果邊check 啦～」
原來真係要咬住唔放，態度堅決先得！
終於，等到探病時間，Lak來探我，我們才可以去婦產科照超聲波。見到BB心跳，見到BB郁來郁去，彈彈下，我們都很開心，放心晒。婦產科醫生又係問一句答一句：「得十一週，就咁聽聽唔到心跳。」「去唔到小便好正常，好多孕婦都係咁。」「無得醫，等個胎大ｄ，個位置移過ｄ，唔會壓住個膀胱咪無事囉。」
又過了一晚，驗血和驗尿報告都正常，我也可以如常去到小便了（BB應該乖乖地移返好個位勒），我也可以出院了，總算有驚無險。
呢個係大概十週左右的肚。其實都分唔到係BB，定係食飽飯的大肚腩。陀B到大概六週左右，我便開始頭暈暈了。對暈這感覺／經驗一點也不陌生，第一次暈（真係暈低失去知覺果種），是在小學的時候，有個同學仔，晨早六點幾來電，我坐在沙發上和他講左兩句，就失去知覺了，到醒時，我平躺在沙發上，再拿起電話，他還未收線。到現在也不知道那次我是睡著了，還是暈了。
但之後，我都無再暈低了，直至去年，有一天雨天，我和Lak仔去茶餐廳食Tea，我一踏出餐廳門口便跣低了，整個人坐在地上，開頭只是覺得很痛，然後眼前便慢慢開始變黑，那感覺比突然暈倒更恐怖。Lak很驚，他扶我回餐廳坐下，然後喝令餐廳的人報警。我感到自己開始失去知覺，雙眼已經看不見了，眼前一遍漆黑，但我覺得拋下Lak仔一個抱著一個暈了的女子，面對這局面，實在太可憐了，我用了最大的意志力，叫自己唔好暈，用僅有的力氣對Lak說：「我覺得好累，好想訓……」「唔好訓呀……」「我好無力，我好想訓，但好驚我訓左……」「唔好驚，我係度，唔好訓呀……」
有一刻，加上以上的對白，我真的覺得自己就快死了。那時並不怕死，因為如果死是這樣的，一點也不痛苦。現在回想，如果我這樣死了，也不算差，沒有病痛的折磨，又有Lak在身邊，臨死前，我是個快要結婚的新娘，開開心心，而且還剛吃了下午茶！不過，Lak就太可憐了，他的未婚妻就這樣，食左個Tea，就暈了，死了。這裡還是一間著名的餐廳，他以後一定會有陰影，怎過下去啊～
咁當然，我沒有死，救傷車來了，救護員問了Lak一些問題，然後說我血壓很低很低……可能因為感到自己有救了，沒有那麼panic，我也漸漸回復清醒，被抬上救護車。我見到Lak哭了，我也哭了。上了車，我已經完全回復清醒，就像沒事發生過一樣。救護員問我今天吃了甚麼東西，我們都十分不好意思的說，我們訓到兩點幾才起床，三點幾才吃了個Tea。救護員原本想斥責我們兩句，但發現我的血糖並不低，所以也沒說甚麼。
到了急症室，我躺在床上，Lak在旁拖著我的手，我跟Lak說對不起，Lak又哭了，我又哭了，但又覺得這樣有點搞笑，所以又笑了起來……
結果醫生也只說我暈低是因為血壓低了，太多人太焗太驚或受到太大碰撞，都可能會這樣。
我已經有左三個月啦～這三個月實在有很多事情發生，非常充實，也有點驚險，遲下再慢慢講。
曾經幻想過很多次，當我見到驗孕棒出現兩條線的一刻，會有多興奮，我會立即告訴老公，然後兩公婆相擁流出喜悅的眼淚之類……但現實的確和幻想有點差距，到這一天的來臨，老公比我早上班，已經霸佔了洗手間，但我又急小便了，而且驗孕棒包裝說要用早晨的第一次小便驗才準確的，所以我唯有趕老公到廳刷牙，然後自己慢慢驗。
結果，好快出現明顯的兩條線，可能我也估不到咁快，感覺有點突然多於興奮。我走出浴室告訴老公，由於佢仲刷繄牙，所以佢只係瞪大眼睛望住我，含住牙刷講左一些一舊舊的說話而已。
之後我就上床訓返勒，哈哈哈！不過，老公臨出門口上班，都有整醒我，和我相擁了一下，說：「越諗越開心呀～～！」之後，我又訓返。
