Surviving Motherhood

之前提過出院之後的兩個星期，差不多天天都哭。

第一次是因為谷奶，痛到喊。

第二次是出院當天，陪月，奶奶、叔仔也來幫忙。大家都很好，我一餵完奶，便接手照顧BB，要我去睡，不讓我掂水、不讓我蹲下來，不讓我拿重的東西，不讓我走來走去……對於向來不喜歡生活被干涉的我，他們的「協助」，實在很難頂！雖然很累，但我不想去睡，我想洗澡，我想收拾出院後的物品，我想抱BB，我想看看書上上網……我覺得這樣才是休息啊。

好不容易，等到大家都走了，我就哭著對Lak說：「我要沖涼啊！我要洗頭啊！否則我會產後抑鬱。」嚇得佢～

第三次，是出院第二天，我們去母嬰健康院，姑娘問了我和Lak很多問題：BB出世的重量、一日食幾多餐、換幾多次片，每條片有幾重、便便是甚麼顏色、便便有冇粒粒……丈夫有沒有給我支援，嘩！問到呢條就死勒，我即時諗起，這幾天，Lak與我並肩作戰，通宵餵奶換片，還要被幾個女人（奶奶、媽媽、陪月）點來點去，買這買那，頻頻撲撲，其實他也並不比我舒服，「他十分支持我啊！」我說，鼻子一酸，眼眶就充滿淚水了。我當時是背著Lak坐的，他看不到我想哭，但姑娘卻全看在眼裡，她不動聲色咁問多一兩條問題，然後就使走Lak：「我還有些問題要單獨問問媽媽，爸爸先出去吧！」

Lak一走，姑娘就立即慰問我：「丈夫真的有支持你嗎？他對你好嗎？」噢！！！她以為Lak虐待我！我立即澄清：「有有有，他真的很好，我諗，我只是太辛苦了。」一講到這裡，我又忍唔住喊起上來，實在太太太太太失禮了。姑娘再溫柔地詢問：「是因為餵人奶嗎？餵人奶是很辛苦的，你是自願選擇餵人奶的嗎？記住呀，你可以選擇架，如果太辛苦，你可以餵奶粉。」噢！！！她以為Lak逼我餵人奶。

我冷靜下來，再好好解釋我覺得辛苦的地方，姑娘終於安心了，十分親切地安慰我：「傻妹，係咁架啦，你岩岩生完，受荷爾蒙影響，係容易喊ｄ的。我生果時都唔知喊左幾多次啦～頭幾個月係辛苦ｄ，到佢大ｄ，好湊ｄ，同你培養出感情，樂趣就會黎架啦～你睇下，BB重得咁好，你又唔使補奶粉，已經係好叻好叻架啦！」聽姑娘咁講，我諗諗下，又真係覺得自己都幾叻喎，之前掛住忙，都唔記得讚自己添。

自從知道自己易喊是受荷爾蒙影響，我就豁出去了，有少少唔順意就喊，無得訓喊，有得訓又訓住喊（因為訓左就無時間做其他野），奶奶關心我又喊（當然是背住佢喊啦，咪嚇死佢咩），媽媽嘮叨我又喊，覺得老公好好又喊，覺得老公好衰又喊……所以就攪到頭兩個星期差不多日日都喊過咁滯，有時仲攪到兩公婆一齊攬住喊……又係而家諗返就覺得好低能，但當時真係覺得好慘架。

冧晒啦

原本想呻埋湊仔有幾辛苦，但今朝畀阿仔氹返，冧晒啦～

今朝阿仔六點幾就開始嗌，Lak起身查探，見佢唔係扭食，就叫我繼續訓，佢去暗阿仔訓返。

暗左半個鐘，阿仔仍然依依呀呀，用他的BB話嗌下叫下又停下。我心諗，個仔一定係扭食啦，呢樣係唯一爸爸畀唔到佢的野。點知我行埋佢床邊，一摸佢塊面珠仔，佢就望實我笑啦，完全唔係喊食！佢個樣好似想講：終於見到你啦，我叫左咁耐就係叫你咋！

真係好sweet架佢個樣，Lak就只有在旁羡慕啦～

之前都唔覺同BB有甚麼特別的Bonding。初初由醫院回家，BB對我和新環境仍然非常迷惘和陌生，佢根本唔知我係佢阿媽，對佢黎講，我只係一個粮倉。食完奶，利用完我，就呼呼大睡。有時佢喊，Lak或陪月抱佢，都可以安撫到，但我一抱佢，佢就喊得仲大聲，因為佢聞到我陣奶味，又發癲要喊食。

經過七八個星期日餵夜餵，佢終於識得望住我笑，仲會用BB話同我傾偈，真係守得雲開囉～

石頭胸

生仔後確實有點產後抑鬱，而主因是餵人奶。

我可以說餵人奶比陀仔和生仔辛苦十倍。我覺得陀仔一點也不辛苦，而且我是開刀生仔的，傷口真的不太痛。

生仔之後的頭兩個星期，差不多天天都哭。

開刀後第一天，我便下床去餵奶了。第一次並不成功，阿仔掛住訓，我又不知從何入手，St Paul的姑娘也沒有甚麼有用的指導（我覺得St Paul麻麻地）。這次之後已有點沮喪，但仍叫自己不要放棄，大家都說餵人奶並不是輕易的事。

第二日我努力嘗試，卒之阿仔肯啜了，我的奶媽生涯正式開始。

那天晚上，維記和Karen來探我，送走她們之後，我去參加出院前的講座，漸漸覺得個胸越來越硬，越來越痛，開始上奶了。

講座完畢後，我問姑娘借奶泵，但姑娘叫我唔好泵，因為越刺激佢地就越痛，叫我忍一晚，第二天阿仔出院後，我正式餵奶就無事了，並叫我用熱毛巾敷。於是那天晚上，我便走來走去，到洗手間用熱水敷胸，不過，這個方法是不行的，我的胸越來越硬，越來越痛，大左兩倍，變左石頭胸。

這是生仔後第一次喊，痛到喊。我忍無可忍，打電話畀餵緊人奶的Natalie和陪月，她們都叫我一定要泵出來，否則乳腺塞左發炎仲麻煩。晚上十點幾，我再到哺乳房找姑娘，今次個姑娘話抱阿仔出來畀我餵，但阿仔未係好會食人奶，我出奶也未係好流暢，結果餵左好耐，都只係舒緩左少少。

回房後，上床典來典去，越來越痛，又谷過。於是零晨兩點幾，我又騰去哺乳房，今次另一位姑娘又畀我泵奶了。入到去，見到另一位媽媽泵緊奶，我們立刻有同病相憐的感覺，雖然又累又痛，但一邊泵，一邊有人傾下講下，都無咁慘。