LLB成績出左，全部合格啦！可以升班了！
4.9.07
16.8.07
颱風過後
傻上星期去了愉景灣
一邊吃Lunch，一邊欣賞兩隻傻狗執波
……感到，看著兩隻狗傻笑的自己其實更傻 。
懶
自從考完試，便開始喪懶
本來諗住懶一個月，現在已經怒懶了三個月
這三個月，我原本想用來練英文、普通話、日文、學會投資、看完四本未看完的小說、畫一幅畫、好好休息……結果都沒有做到。
樂
這三個月，做了甚麼？我逛了很多街、買了很多漂亮的東西、看了些很好看的戲、追回了漫畫的進度、看了很多雜誌、轉換了強積金的組合、打了很多機、見了很多朋友、見多了家人、做多了運動……感到很快樂。
7.8.07
Collage
朋友送了一張Amazon的coupon給我。買了三本書，都分別寄來了。
第一本寄到的是Sabrina Ward Harrison的《The True and The Questions》。
看著、用手觸摸著書裏的相片、collage，腦裏又會出現一些自己生活中的畫面，例如最近看的戲，Before Sunset 的開場，Jesse在書店裡，說：Life is the sum of the moments in your life……然後是一雙手的畫面，這是The Best of Youth戲裏Matteo替Giorgia拍的照片，後來，他說拍照要拍到人的神祕……這是書裡的畫面和我記憶中的畫面的拼貼。
這一版，調色碟的顏色好燦爛，於是把書上的照片再拍一次。
看這張照片時，腦裏出現陽光照射下桌子上一堆螢光筆的畫面，令我想起一個人。他遇到意外，受傷了，這段日子常常看到他的新聞，雖然全是差不多的報道，有時說他好一點，有時又說情況很差，但我都很留心去看。
相隔可能有十年了，那時和同學決定拍一套戲交功課。故事發生在一間精神病房，大致是發生了謀殺案，疑兇就在這間病房裡。病房裡有三個病人，各有不同的精神病，偵探一邊調查兇手，一邊帶出三個病人的經歷和遭遇，結果發現兇手是主診醫生……很老套的劇情啊!
其實想講的不是這個習作，而是當時發生的事。我們需要三張床去布置病房，同學都各自有床，但張張都唔同樣，拼埋就唔似病房啦，印象中病房的床床頭應該有個鐵欄，床腳高高的。那時和我一組的同學是他的朋友，他正在中大讀醫，答應幫我們在宿舍偷運三張床出來。
我們幾個同學和他的幾個同學，一起在宿舍搬走三張床。怎樣搬上搬落樓梯、怎樣進Lift、怎樣避開舍監、之後怎樣送回原處，期間有多少波折，有多麼辛苦，我都記不清楚了，也忘了和他說過甚麼，他又跟我說過甚麼，只有大概的印象，他很有禮貌，好好人（梗係好人啦，咁都肯幫）。唯一清楚的畫面，是走進他的房間，看見窗外的陽光照著書桌上的書，上面有一堆不同顏色的螢光筆。
那個畫面對我沒有甚麼特別意義，現在突然出現，卻又異常清晰，可能因為豐富的色彩特別入腦吧。
我在想，美國一個女孩子對著調色盤拍的一張照片，幾年後在香港、在我的腦中，和十年前的一個畫面拼貼在一起。她拍這張照片時不會知道有我這個人會看，十年前的我對著他，不會知道十年後我會寫一篇關於他的文章，而他正躺在醫院中奮鬥著……
希望他早日康復。
10.7.07
南瓜炆雞
星期天，在fating家吃了美味的南瓜炆雞後便念念不忘。昨天放工，便捉住她一起去吉之島買菜。
在fating的指導下，煮了我人生的第一味「食送」（家政堂的堂課除外）！
材料：
南瓜
日本麵豉醬／味噌
雞槌（因為雞翼太大包，其實雞翼好味ｄ）
雖然中間出了一點亂子，我掛住看東張西望，忘了睇火，有少少黐底，樣子不算太完美，
但不是騙你，真的十分美味！
評分：＊＊＊
9.7.07
Wii Party
星期六、日去了fating家繼續Wii，今天又是手酸背痛地上班了。Fating自製的梨批，極、絕、超、勁、喪、爆好味!
真係全世界都在wii，昨晚煲久違了的《愛生事家庭》，連小鐵爺爺都wii，嗯…Kii。
爺爺抽獎中了化名Kii的Wii，但唔知點玩。他決心在孫兒們回來前學會，得到孫兒的愛戴。
他以為要投幣。
把remote當head phone。
結果爺爺自創了很多新的wii games。還再付一千日圓，玩多次。
5.7.07
3.7.07
25.6.07
好好玩
上星期玩了兩個很好玩的遊戲。
在朋友家玩Pictionary，緊張到、笑到標晒汗……可惜沒有帶相機拍下大家的瘋相。諗諗下，呢個遊戲都幾益智，決定加入現在做緊的遊戲書仔入面。
星期日，去了杏仁家，玩BB和玩Wii，又是玩到標晒汗。
Fating和家明在打拳，家明很兇狠啊。
欣欣姐帶病上場，一邊咳一邊打網球，仍然贏晒！ 
歌仔：你估下邊個抱住我？咪係星雲……姐姐囉。
在朋友家玩Pictionary，緊張到、笑到標晒汗……可惜沒有帶相機拍下大家的瘋相。諗諗下，呢個遊戲都幾益智，決定加入現在做緊的遊戲書仔入面。
星期日，去了杏仁家，玩BB和玩Wii，又是玩到標晒汗。
Fating和家明在打拳，家明很兇狠啊。欣欣姐帶病上場，一邊咳一邊打網球，仍然贏晒！ 歌仔：你估下邊個抱住我？咪係星雲……姐姐囉。21.6.07
Megabox
上星期和Karen、Naomi去了九龍灣的Megabox。逛了Spotlight和B&Q。Spotlight都有ｄ靚靚地的家品，但價錢不算便宜。
一場黎到，買少少野啦，Karen買左隻本製鯨魚飾物，售五元，工作需要影相用，佢搵左好耐啦，原來鯨魚飾物和鯨魚一樣都可能會絕種。
我買了花開富貴檯墊，售八元。離開時，收銀處也有一條不長不短的人龍，但我們三個加埋才惠顧十三元的顧客還是照排隊。
愈看愈喜歡花開富貴檯墊。
順便介紹，吊雀，在元朗夜冷店購入，售十元四隻，四隻也是不同款式的。原本吊在聖誕樹上，現吊在燈下更覺有趣。
B & Q很大。
很大。
B & Q很大。 很大。15.6.07
細妺
我是個粗心大意的女，每逢父母生日、父親節、母親節這些日子，我都會忘記得一乾二淨，更不用說安排節目、禮物慶祝。
這個時候，細妹就會來電，brief一次慶祝項目，我只要到時出現，或按指示辦事便可。細妹也包辦了一切家庭活動，出遊行程、交通安排、餐廳訂位，以及家裏的電器裝置維修、家俬裝卸等等。
剛過的母親節，細妹五時便到達大榮華排隊，而我因為太累，在家睡了，我那天收到的指示是七時左右和父母乘的士到現場。寫著寫著，也忍不住笑了，因為實在太廢人。
今個星期日便是父親節，由於細妹上了大陸公幹，所以還未收到指示，有點憂心，所以便想起她了。
找到這張相，小時候我們常常都會穿成兩個「紅人」，紅褸紅褲紅鞋，細妹穿的小紅褸，印象中我也穿過，而更特別的是，我發現原來我是會把褲「休」到束住件track suit的！袋子裏腫脹著的是利是，有了錢，難怪我會有個野心勃勃的表情。
這個時候，細妹就會來電，brief一次慶祝項目，我只要到時出現，或按指示辦事便可。細妹也包辦了一切家庭活動，出遊行程、交通安排、餐廳訂位，以及家裏的電器裝置維修、家俬裝卸等等。
剛過的母親節，細妹五時便到達大榮華排隊，而我因為太累，在家睡了，我那天收到的指示是七時左右和父母乘的士到現場。寫著寫著，也忍不住笑了，因為實在太廢人。
今個星期日便是父親節，由於細妹上了大陸公幹，所以還未收到指示，有點憂心，所以便想起她了。
找到這張相，小時候我們常常都會穿成兩個「紅人」，紅褸紅褲紅鞋，細妹穿的小紅褸，印象中我也穿過，而更特別的是，我發現原來我是會把褲「休」到束住件track suit的！袋子裏腫脹著的是利是，有了錢，難怪我會有個野心勃勃的表情。
12.6.07
久休復出
終於考完試啦！可以復出去玩去食去睇戲去gym去shopping啦！雖然考得一般啦我覺得，但都幾enjoy整個過程，像回到從前會考的日子：
和同學study group，跟著一起打邊爐、燒野食。
溫書溫到三更半夜，電話響起：唔好訓呀～～
六點鐘起床，看著日出，準備去考試。
前往那些荒蕪的中學，互相祝福，然後慷慨就義，走入禮堂……
還有，考完最一科那種興奮和解脫……
昨天和Karen、May去了銅鑼灣的盛八吃日式燒肉，真的很好味！
原來和May已經三個多月沒見了。
9.5.07
Le Fating May
繼續係Fating的生日特輯。
我們會合維記，去了中環卑利街附近（我又唔記得街店和店名）一間意大利餐廳吃飯。
餐廳的裝潢很漂亮，我們還選了門口旁邊的桌子，感覺很好。
我覺得最好吃的是，那個小小的圓麵包，味道像Doughnut。還有那一小杯樣子精緻的沙律。
3.5.07
24.4.07
赤柱
去了赤柱，吃飯時和朋友傾偈。 娜 ：我想買股票。
朋友：……有廿五日線、五十日線、一百五十日線……當三條線向上集合埋一點就係黃金交叉，就買勒；當三條線向下集合埋一點，就係死亡交叉，要放勒……
娜 ：係呀？咁幾時會有呢ｄ交叉呀？
朋友：我試過啦，唔準既～
娜 ：……
********************************************************************
娜：你有冇聽過一個比喻，人生就好似一個玻璃樽，咁呢，人生入面最重要的野就係石頭，例如健康、家庭、愛情咁；其次重要的係沙，例如金錢、事業、旅行見聞咁；最唔重要的係啤酒，例如shopping、打機、享樂之類……咁當然每個人都唔同啦。
假設每個人的玻璃樽係一樣的，每人的石頭、沙同埋啤酒都係一樣多，有ｄ人先倒啤酒，然後放沙，個樽已經差不多滿，一放石頭，ｄ啤酒就會漏出黎，入唔晒。
但有ｄ人先放石頭，然後放沙，咁ｄ沙就會fill左石頭之間的空隙，最後慢慢倒啤酒，啤酒又會滲入去ｄ沙度，就可以岩岩入得晒。
朋友：填海都係用差不多的原理，不過係先有水先，沙同石應該要一齊放，不能先放石，也不能先放沙。沙同石混合先會穩固，亦係最有經濟效益的。
娜 ：……好想返去試下喎。
********************************************************************
唔知點解，傾到李天命
娜 ：我記得曾經睇過一本李天命。
娜 ：我記得曾經睇過一本李天命。
朋友：點解會想睇。
娜 ：果時好似好忙……可能想睇下佢會唔會知道，點解要咁忙。
朋友：結果呢？
娜 ：結果，我淨係記得，佢話：如果上帝係全能的，咁佢可唔可以創造一舊祂搬唔起的石頭？如果可以的話，祂搬不動舊石頭，祂不是全能的；如果祂不能創造一舊這樣的石頭，那麼祂也不是全能的。
朋友：勁低能……
娜 ：你話我，定係佢？
**********************************************************************
去到相對論
娜 ：關於相對論，我淨係知道E=MC2，同埋有個人搭火車……完。
朋友：係，有個人搭火車，架火車以光速行駛，咁個人所在的車廂，時間就會停頓。
娜 ：點解？
朋友：時間、能量同埋速度係可以互換的。
娜 ：……（呈發癲狀）
********************************************************************
傾偈真係一件好開心的事，下次再傾過。
19.4.07
18.4.07
花草樹木
舊同事John在太古坊開了一個插畫作品展。展覽的題目係《花草樹木》“ALL ABOUT NATURE”。未識John之前，已經喜歡他的畫，感覺單純、直接又強烈，喜歡那些熊仔、兔仔、狗仔……好像全部都有心事，或者患病。當然，還有那些濃濃烈烈的Acrylic顏色。
我還在用John設計的筆袋呀，不過上面的公仔已經甩甩地。13.4.07
最後一邊
好眼訓……等我在辦工時間，回顧下剛過去的復活節的活動啦。
上星期三，無啦啦寒冷天氣警告，把心一橫，去了譚漁頭打邊爐。
相信都係今個冬天的最後一邊了吧。
星期四，返元朗省親，和細妹行街，竟然買左兩件衫，一對boots，相信都應
該要係今個冬天的最後一boot了吧～我唔可以再買野、唔可以再買野……
星期五，和Karen、維記在卑利街的Brunch club 食brunch，之後返港大上堂。等我考完試，要再去過。
星期六，回家溫書，乖。
星期日，返學。晚上看了太陽倒數。這套戲，開頭幾好睇，又係講人性，幾自然流暢。講人對太陽的迷戀，幾得意，但唔係好說服到我。後尾，無啦啦多左隻怪物，突然又變返一般太空異形怪獸追逐廝殺驚慄片，奇。
之後去左天后天橋底一家糖水舖，叫甜姨姨，都幾好生意咁。我食左其中一款：由芒果布丁、鮮芒果肉、芒果乾製成，一種甜品三種口感，係愛芒果人士的恩物。
好吃嗎？OK……咁啦，其實咪就係同一時間食芒果、布丁同埋芒果乾囉，嗯……都不妨一試既。
星期一，貪得意去左嘉亨灣，參觀豪裝示範單位，以及享用免費自助餐。晚上，去文化中心睇電影節惡女花魁，靚。
回顧完復活節的活動，仍然好眼訓……幸好，仲有一個多小時，又放假了！Yeah！
2.4.07
澳門
星期六日，去了澳門玩。參觀了新葡京、永利和星際賭場，無食免費叉燒飯，但飲咗一杯蔘蜜，仲贏咗兩百蚊。
住在新世紀酒店。
之後去左賽車。我是同行的朋友中，唯一敢落場的女子。係咪好威猛呢？會唔會係佢地太細膽呢又？其實我都唔係要同佢地賽的，我的目標只係唔反車，唔剷上草地，唔撞埋石駁，同埋唔俾人撞。
第一個圈幾緊張，因為之前賽車師傅，講到果ｄ咩手臂彎呀幾咁危險咁，但順利過渡第一個圈後就輕鬆晒。駛咗幾個圈覺得無聊，開始留意果ｄ賽車男的車品，有ｄ衰仔，專吼你轉彎先黎過頭，懶醒咁，鬼咁危險；有ｄ古惑男，快到甩晒尾，但駛回觀眾台時就變慢速，怕被女朋友見到閙……順利駛完廿分鐘，隻手同踩油隻腳勁攰呀～～
去了無乜黑沙的黑沙海灘。我做乜咁開心呢？
因為有美味的燒雞翼
原來漁人碼頭係廿四小時開放的，都幾好hea。
我做緊咩呢……好迷幻。
一班朋友胡扯，就係最好的節目。
第二日，去左教堂同埋東望洋，買完手信，走lu……
食，係去澳門的主要節目，雖然今次無去甚麼特別的地方食野，但都不妨列出兩日假期的餐單同埋評分，俾大家參考下：
（＊＊＊＊＊最高分）
第一日
早餐
信德中心麥當勞 ＊＊＊
星際賭場免費蔘蜜 ＊＊
午餐
氹仔蟹粥 ＊＊＊＊
下午茶
賽車場咖喱雞翼麵 ＊＊＊
安德魯葡撻 ＊＊＊＊＊
黑沙海灘街邊燒雞翼＊＊＊＊＊
晚餐
小飛象葡國菜 ＊＊
漁人碼頭熱檸茶 ＊＊＊（因為開心，所以加分）
******************************************************************* 第二日
早餐
氹仔豬扒麵 ＊＊（未有豬扒包出爐）
午餐
禮記雪糕新地 ＊
鉅記葡撻 ＊＊
晚餐
太古城華昌肉丸粥 ＊＊＊
訂閱：
文章 (Atom)