老豆最近的身體不太好，今年已經進了三次醫院。媽咪叫我和男友Lak仔提早斟茶，拜堂成親沖喜一下，當然十一月我地會照擺酒啦，大家早ｄ到：)上個星期，我同Lak仔斟左茶啦，當日並無邀請任何親戚朋友，只有我們兩家人，十分簡單，也十分溫馨。當日的服裝和化妝係我自己，攝影就係細妹和Lak仔細佬。大部分相片和錄影還未收到，睇住我部相機入面僅有的少少花絮先啦。
原先以為只係斟茶拜神，但媽咪好鬼認真，買齊晒果ｄ紅睡衣和上頭用品，咁所以，我地都已經上埋頭添（原來男仔都要上頭架，我一直以為只係女仔要）。根據上頭套裝的資料，原來上頭時要噏四句野，三梳兒孫滿地之後，仲有一句「四梳四條銀筍盡標齊」，之前上網摷資料，睇其他人寫的結婚blog，有人話自己阿媽講左：「四梳四條甘筍盡發芽」！我當時笑左好耐，但估唔到，輪到自己媽咪，她竟然又講左：「四梳四條甘筍盡出齊」！！我忍唔住立即糾正佢啦，媽咪迅速補梳一野，所以我的上頭共有五梳，四梳係甘筍，五梳係銀筍……
其實直到當天早上，我還在電話中跟Lak仔說：「我好像還未準備好結婚的情緒，好難投入呢～」但到斟茶時，跪在爸爸媽媽面前，聽著他們一句句祝福和叮嚀，眼淚便忍不住流出來了，我自己也嚇了一跳，真係兩行眼淚盡標齊呀。
到男家，Lak仔斟茶畀他媽咪，佢又同我一樣想喊！不過，阿奶奶錯把給他的利是直接遞畀大妗姐（我細妹），Lak仔的一眶眼淚未流出來便爆笑了～
呢個就係Lak仔啦！呢張相睇真ｄ，我右邊面還有一條淚痕，正捧著金器在發笑。
等我戴晒ｄ金器先～
男家的相片未收到，下次再記錄啦！以下呢對就係媽咪吩咐我地買的紅拖鞋，Lak仔選了寫明「老公」、「老婆」的，覺得夠cute。嗯……係咪好cute呢～～～
3 則留言:
當年斟茶給父母, 父母同我亦感動得流淚。 很期待11月參加你的婚禮, 一定很多感動位。成了婚, 就努力造人。
恭喜晒恭喜晒！！！
拿，娜，作為一個少女, 我有幾個問題希望Lak太你儘量幫我解答：
1. 三梳唔係「兒孫滿地」咩？
2. 咩叫「銀筍」？「盡標齊」的「標」又係咩意思呢?
3. 到11月你地真結婚時又o係度勁喊的話，敢問我同維記該如何是好？
4. 這題是問羊太的：當年你斟茶時有喊咩？死啦我一d印象都冇，唔通我真係偷懶偷得咁離譜（我承認玩開門利是時我係偷懶偷到hea坐一旁的）？
問完問題，再來言志。無，我見原來Lak生咁喊得，就決定呢，11月要勁搞喊佢。一定要佢喊得多過你、我和維記加埋，呵呵呵呵呵~~
Naomi羊,
造人呢單野，你會唔會心急左ｄ呢～
少女fating,
1. 三梳的確係「兒孫滿地」，你係一個好清醒的少女！我已在原文更正了：)
2. 我都唔知係咩意思呀，上網查過，有人話係代表「由始至終，和諧偕老」的意思喎
3. 保持鎮定！
4. 請羊太解答。
言志題． 要搞喊Lak生其實無乜難度，但要佢喊得多過晒我地加埋，就係一項挑戰！佢同你單打獨鬥，可能都贏唔到……anyway，加油呀！
發佈留言