我和老豆坐小飛象

我又去迪士尼啦～ 今次米奇穿唐裝，米妮穿旗袍。睡公主城堡倒貼了兩大個福字，勁怪。

今次同老豆、媽咪和細妹一家人去，感覺十分溫馨，仲有少少浪漫添～

我地睇晒所有表演項目，坐了火車、船等無驚無險的機動遊戲，玩了一轉Winnie the pooh，最後去坐小飛象。

原來對沒有機動遊戲經驗的兩老來說，小飛象係好「驚險」的。在排隊等坐小飛象期間，媽咪應該係有小小緊張的，但沒有出聲，老豆就拿錶出來計時，安慰阿媽：「飛兩分鐘咋，好快過。」、「如果一陣驚就合閉眼啦。」又好笑，又sweet啊～

本來想讓兩老坐一隻小飛象浪漫下的，但又怕佢地唔知要扣安全帶，所以還是我和細妹一人mark一個。

我和老豆在星空下，一起坐小飛象啊，原來都幾浪漫。

題外話，迪士尼員工全都很友善有禮貌，但卻有些搞爛gag。

首先小飛象哥哥，見我和老豆一起坐，就問：「呢個你細佬呀？」……嗯～OK啦，我知你想逗老人家開心，我原諒你。

還有負責駕船和導遊的哥哥，他跟小朋友說：「被水淋濕唔緊要喎，呢ｄ係迪士尼神奇魔法水，兩個鐘頭內會消失的，呢ｄ咪咩直(magic)囉～」臨走又同小朋友講：「下次再黎丫，我每日要玩十個鐘呀，都唔捨得走……」、「你地要俾心機讀書呀，唔係好似我咁，細個唔讀書，大個做運輸……」gag，未免有點爛啊哥哥。