奶茶（一）

我對奶茶並沒甚麼研究，只是喜歡喝，每天喝過奶茶才能把魂魄集合回來。對我來說，奶茶是一種感性的食物，是我的「精神」食糧。

和惡霸同事劉Brenda曾有這樣的對答
我：「好眼訓呀！好似未訓醒咁！」
DA：「乜你有醒過咩！？」

雖然佢好鬼衰，但都講得幾ｏ岩，因為我經常處於半睡狀態，只有喝奶茶，才能令我由植物人變回常人一個。喝過奶茶後，人也會精靈活潑ｄ、聰明伶俐ｄ，甚至會有點過度活躍。我覺得奶茶很神奇，令我想起日本人的「能力頭巾」和《紙牌的秘密》裏的彩虹汽水。

我的情緒起伏很大，一早醒來可能會覺得很苦悶很無聊很低落、好唔鐘意自己、覺得自己唔知做乜、做人唔知為乜、甚麼也不想做、甚麼人也不想見……跟住，就會浮浮下咁走去茶餐廳吃早餐和看書……半杯奶茶之後，我就會「醒覺」，視力回復正常，看得見美麗的陽光；腦筋回復正常的運作，想到有很多事想做、有很多新的諗法，連帶玻璃反映出來的自己都好像變得精神、美麗多了。曾經跟一個從事臨床心理的朋友說過我的個案，佢好感慨咁話：如果個個人都好似你咁，飲杯奶茶就開心晒，咁我地就好做啦。

奶茶就是我的Prozac？後來看一本月亮星座書，說月亮星座是雙魚座的我，很容易沉溺酒精或毒品。噢，咁我都算執返身彩，只係飲多杯奶茶ｏ者。