偷桃花

昨晚，年三十晚，全香港到底有多少男女在花巿偷桃花？以我所知，就已經有我、我細妹、我媽咪、Karen以及她的數位朋友，連她的一位「執法人員」朋友，也心郁郁，想以身試法。

點解要去偷桃花呢？原來，據說在年宵巿場偷一朵合眼綠的桃花（一定要偷，買或請求檔主給予都不能成事。）如果心中已有目標，就要一邊偷一邊想著，得手後，入落利是封，放在枕頭底，墊住訓一年，就會無姻緣有姻緣，有姻緣就會更上一層樓咁啦。

一向奉公守法,膽小怕瘀的我,為了姻綠咁大件事,也不惜以身犯險啦。首先,為了測試一下難度,我就先向公司棵桃花埋手,趁唔多覺,順手摘桃花,點知,要摘果朵就摘唔到,周圍果o的就四散甩晒落黎,都幾呢hea,好彩無乜同事發覺o者。

到真正行年宵,落手時都幾驚,因為有之前的陰影,驚o的桃花又仙女散花咁跌晒落黎,咁我當場被捕,可以點解釋呢？如果對方唔體恤我的用心，把我拉上差館，咁第二朝的報紙會點寫呢？我雖然不是「執法人員」，但都係好地地一個「教育界」人丫。我好不好供埋其他在港九新界各地摘桃花的朋友出黎，有人陪呢？

就這樣忐忑地，我和朋友鬼鬼祟崇，扮晒揀桃花，然後我就優雅地伸手，氣定神閒地摘下了一粒桃花！慢慢地離開險地之後，實在難掩心中的興奮！竟然這樣順利！而我竟然表現得這麼好！目標達成了，我和朋友去了買風車，買燒賣吃，很開心。後來接到細妹報喜的電話，她那邊廂也成功和媽咪偷到桃花了！媽咪其實係為我偷的，因為她怕我會失敗，所以雖然她極驚青（細妹形容），但仍出手了！母愛真的偉大。

其實我地今次的行動，都有ｏ的快閃黨feel。但看到大家為了自己的幸福，為了這樣單純、美好的願望而緊張、臉紅、興奮，真的覺得很可愛，令我這個新年增加了不少甜蜜。

下面就是朋友在年宵買給我的風車，插了在書架頂，每朝起床第一眼就會望見它，好似太陽。