HALLOW喂！

終於都唔使晚晚做到十一點幾啦！星期一，送完書，全人類放假！我回巢眠了一眠，晚上便去海洋公園HALLOW喂！除了我，還有去嚇鬼的Almond、Karen，有被鬼嚇的May、Water和欣欣姐。欣欣姐戴了我的巫婆帽，型！

至於佢阿媽，由於扮相太恐怖，所以我勁縮小了佢張相，一來減輕驚嚇度，二來減低被她斬殺的危機。Almond後來還買了個骷髏骨面具，戴上後，不斷有途人話「呢件正呀！」……作為一位女性，我覺得能夠有一個晚上，人人話「正」，都真係一個值得記念的光輝時刻！

本來呢，我以為自己係眾人中最膽小的，連欣欣姐都應該強過我。但事實發現，並不是這樣的。當我們進入第一個嚇鬼場地，我和阿May都不知道已經開始了，還以為仲排緊隊，仍然輕鬆地大談減肥的問題，當阿May說：「我仲要減多七磅……」話音未落，便有一喪屍撲出來，我來不及反應，阿May大叫一聲，然後開始亂竄，她直闖向前，但又不敢獨自前進，所以又竄回，大叫：「唔好行埋ｏ黎呀！！！」我已經唔再識驚了，只有不斷仰天長笑－－－－－－

我們共去了四間鬼屋，包括「森林喪屍」、「粵劇名靈」、「驚嚇瘋人院」和「發癲小丑」（我已經唔記得晒佢地的真實名堂，這些名都是憑記憶作的）。我覺得最驚嚇的是「瘋人院」，佢地的嚇人技倆好密集，完全無冷場，有位阿姐嚇完我之後，以為走左啦，點知佢又番兜，突然追上來，在背後叫我一聲「姐姐～」，我覺得呢下幾得囉，個心真的寒了一寒。另外，之前幾間鬼屋的鬼都唔會掂我地，但呢間的鬼竟然抹我塊面！！

在「發癲小丑」那裏，排在我前面的阿哥好鬼驚青，成日唔敢行，塞住晒我地後面成堆人，後面的人行唔到上ｏ黎，ｄ小丑沒有新客，唯有搞完我地一勻，又搞一勻，我結果忍唔住騷擾，就不停安慰和欺騙那位阿哥：「前面無野ｏ架啦，快ｄ行啦。」